Бишкекте 2 миңге чукул көп кабаттуу үйгө жылуулук берилди
Бишкек шаарында 29-октябрда 1 870 көп кабаттуу турак үй жылытуу системасына кошулду. Бул тууралуу Бишкек мэриясы билдирди.
Маалыматка ылайык, "Бишкекжылуулуктармагы" муниципалдык ишканасы жылуулук системасындагы гидравликалык режимдерди жөнгө салуу жана абоненттерди жылытуу системасына бирдей шартта кошуу иштерин жүргүзүүдө.
Жылуулук менен камсыздоо системасын децентралдаштыруунун алкагында № 10 кичи район толугу менен "Бишкекжылуулукэнерго" ишканасынын карамагына өткөрүлдү.
Учурда ишкана аталган аймактагы турак үйлөрдү жылытуу системасына кошуу иштерин баштады.
Мындан тышкары, кечээ Куруучулар шаарчасындагы, Энергетиктер шаарчасындагы жана Учкун кичи районундагы турак үйлөрдү жылытуу системасына кошуу иштери башталды. Учурда бул аймактардагы 57 турак үй жылытуу системасына кошулду.
Аталган аймактар да децентралдаштыруунун алкагында "Бишкекжылуулукэнерго" ишканасынын карамагына өткөрүлгөн.
