ЕАЭБдин тышкы соода жүгүртүүсү 5 жылда 25%га өстү – А.Касымалиев.
2025-жыл беш жылдык стратегияны ишке ашыруунун жыйынтыктоочу жылы болгонун 27-мартта Адылбек Касымалиев Евразиялык өкмөттөр аралык кеңештин жыйынында билдирди.
Анын айтымында, бул беш жылдык мезгил дүйнөлүк экономикадагы татаал процесстер менен коштолду. Алардын катарына пандемиядан кийинки калыбына келүү, эл аралык соода шарттарынын тез өзгөрүшү, ошондой эле бирликтин айрым мүчө мамлекеттерине карата санкциялык басым кирет.
"Бул чакырыктарга карабастан, биздин бирлик туруктуу өсүшүн улантты. Бул негизги социалдык-экономикалык көрсөткүчтөрдүн оң динамикасынан көрүнүп турат.
2020-жылдагы көрсөткүчтөр менен салыштырганда, 2025-жылдын жыйынтыгы боюнча мүчө мамлекеттердин ИДПсынын өсүшү болжол менен 17% түздү. Ошол эле учурда өсүш бирликтин бардык өлкөлөрүндө байкалды. Бул мезгил ичинде мүчө мамлекеттер ортосундагы товар жүгүртүү дээрлик 2 эсеге көбөйдү", — деди ал.
Мындан тышкары, Касымалиев билдиргендей, улуттук валюталар менен эсептешүүлөрдүн үлүшү 94%га жетти. Тарифтик жана тарифтик эмес чектөөлөр күчөп жатканына карабастан, акыркы 5 жылда бирликтин үчүнчү өлкөлөр менен тышкы соода жүгүртүүсү 25%га өстү.
Акыркы беш жыл ичинде Кыргызстанда экономиканын реалдуу өсүү темпи 55%га жогорулады.
Экономиканын өсүшү негизги тармактардын кеңейиши менен камсыз болду. Атап айтканда:
- өнөр жай өндүрүшү — 51%га,
- айыл чарба — 12%га,
- курулуш — 98%га,
- кызмат көрсөтүү тармагы — 50%га өстү.
