Казакстандын фермерлери буудайдан жасмыкка (чечевица) өтүп жатышат — себептери
Казакстандын айыл чарба тармагы эгин айдоо аянттарын кеңири диверсификациялоону баштады. Өлкөнүн фермерлери салттуу буудайдан баш тартып, кирешелүүлүгү жогору буурчак өсүмдүктөрүнө өтүп жатышканын inbusiness.kz сайтына шилтеме кылуу менен economist.kg жазды.
Аграрчыларды колдоо максатында Казакстандын "Азык-түлүк келишимдик корпорациясы" улуттук компаниясы" ААКы узак мөөнөттүү форварддык каржылоо механизмин ишке киргизди. Программа Акмола, Костанай облустары жана Түндүк Казакстан облусу аймактарындагы чарбаларга багытталган.
Жаңы колдоо программасы эгин айдоо иштерин алдын ала каржылоону карайт — продукциянын ар бир тоннасына 90 миң теңгеден эсептелет. Бул фермерлерге айланма каражаттарды алууга жана продукцияны кепилденген түрдө сатууга мүмкүнчүлүк берет.
Мындай өзгөрүүлөрдүн зарылдыгы түндүк аймактардын буудайга жогорку көз карандылыгы менен түшүндүрүлөт. Айдоо структурасында буудайдын үлүшү 87%га чейин жетет, бул дүйнөлүк баалар түшүп кеткенде же түшүм аз болгон учурда чоң экономикалык тобокелдиктерди жаратат.
Казакстандын Айыл чарба министрлигинин маалыматына ылайык, акыркы беш жылда буурчак өсүмдүктөрүнүн аянты төрт эсеге өсүп, 781 миң гектарга жеткен. Ал эми 2025-жылы дээрлик 1 млн тонна көлөмүндө рекорддук түшүм алынган.
Өндүрүштүн өсүшү экспортко да таасирин тийгизди: кургатылган буурчак өсүмдүктөрүн чет өлкөлөргө жеткирүү 570 миң тоннадан ашып, бир жыл ичинде 1,5 эсеге көбөйдү.
