Кыргызстанда 1-апрелден тарта бардык бюджеттик кызматкерлердин эмгек акылары жогорулайт
2026-жылдын 1-апрелинен тарта Кыргызстандагы бардык бюджеттик кызматкерлердин эмгек акысы жогорулатылат. Садыр Жапаров бюджеттик тармактагы кызматкерлердин эмгек акысын төлөө шарттарын жакшыртуу тууралуу Жарлыкка кол койду.
Документке ылайык, 1-апрелден тарта президенттик компенсациялык төлөм киргизилет. Билим берүү, саламаттык сактоо, маданият, социалдык коргоо жана башка тармактардын кызматкерлери үчүн бул төлөм бир ставка үчүн 15 миң сомду түзөт. Ал эми техникалык жана кенже тейлөөчү персонал, ошондой эле күч түзүмдөрүнүн жарандык кызматкерлери үчүн 5 миң сом өлчөмүндө каралган.
Мындан тышкары, 1-сентябрдан тарта айрым мамлекеттик кызматкерлер үчүн кызматтык айлык акысына кошумча үстөк акылар көбөйтүлөт — иштин татаалдыгына, сапатына жана жыйынтыгына жараша 50%га чейин.
Айрым мамлекеттик органдардын кызматкерлерине (айрым түзүмдөрдөн тышкары) кошумча 15 миң сом өлчөмүндө компенсация белгиленет.
Министрлер кабинетине Жарлыкты ишке ашыруу үчүн зарыл чараларды көрүү жана 2026–2028-жылдарга республикалык бюджетке тиешелүү өзгөртүүлөрдү киргизүү тапшырылды.
Документтин аткарылышын көзөмөлдөө президенттин администрациясына жүктөлдү.
