Кыргызстанга инвестиция тартуу маселеси эл аралык деңгээлде талкууланды
Кечээ Инвестициялар боюнча улуттук агенттиктин башчысы Равшанбек Сабиров "Alpac Capital" компаниясынын башкы директору Педру Варгас Давид жана компаниянын инвестициялар боюнча директору Питер Ваджай менен жолугушту. Бул тууралуу аталган агенттиктен билдиришти.
Жолугушууда Кыргызстанга инвестиция тартуу жана артыкчылыктуу тармактарда долбоорлорду ишке ашыруу маселелери талкууланды.
Равшанбек Сабиров өлкөнүн инвестициялык мүмкүнчүлүктөрүн, инвестициялык климатты жакшыртуу боюнча жүргүзүлүп жаткан реформаларды жана инвесторлорго көрсөтүлүп жаткан мамлекеттик колдоо чараларын тааныштырды. Ошондой эле мамлекеттик-жеке өнөктөштүк алкагындагы стратегиялык долбоорлор тууралуу маалымат берди.
Анын айтымында, Кыргызстан инвестиция үчүн жагымдуу шарттарды түзүү багытында иштерди улантып, эл аралык өнөктөштөр менен кызматташууну кеңейтүүгө кызыкдар.
