Казакстандын бюджети өтө бекем теңгеден жабыркашы мүмкүн
2026-жылдын II кварталынын башында Казакстандын улуттук валютасы — теңгенин позициясы кыйла бекемделгенин inbusiness.kz сайтына шилтеме кылуу менен economist.kg сайты жазды. Эксперттер муну мунайдын баасынын жогору болушу жана салык мезгилинин аякташы менен түшүндүрүшүүдө.
Бирок улуттук валютанын ашыкча бекемделиши бюджет үчүн түз коркунуч жаратат, анткени мунай сатуудан түшкөн кирешелер теңге менен эсептегенде азаят.
Маалыматка ылайык, мунай баасы өскөн шартта өлкөдө чет элдик валютанын ашыкча көлөмү пайда болуп, доллардын курсу төмөндөп жатат.
Казакстандын Улуттук экономикалык изилдөөлөр бюросунун сценарийине ылайык, апрель айында теңге 1 доллар үчүн 462,1 деңгээлине чейин бекемделиши мүмкүн. Ал эми Финансисттер ассоциациясынын аналитиктери май айынын башында курс болжол менен 490,1 теңге болот деп күтүшүүдө.
Учурда теңгени төмөнкү факторлор колдоп жатат:
- катуу акча-кредит саясаты;
- 18% деңгээлинде жогорку базалык ставка;
- инфляциянын 11%га чейин жайлашы.
Эксперттер жылдын экинчи жарымында теңге алсырай баштайт деп божомолдошууда. Себеби салык фактору азаят жана импорттоочулар тарабынан чет элдик валютага суроо-талап өсөт. Орто мөөнөттө курс 1 доллар үчүн 530–540 теңгеге кайтып келиши күтүлүүдө.
Кыргызстан үчүн негизги соода өнөктөш болгон Казакстандын валютасындагы мындай өзгөрүүлөр өз ара эсептешүүлөргө таасир этүүчү маанилүү фактор болуп саналат.
