Кыргызстандыктар 2025-жылы киберкылмыштан 82 млн сомдон ашуун чыгымга учурашты
2025-жылы Кыргызстанда жарандар киберкылмышкерлердин курмандыгына кабылып, жалпы чыгым 82 млн 600 миң сомдон ашкан. Бул тууралуу ИИМдин КИББнын Киберкылмыштарга каршы күрөш башкармалыгынын өкүлдөрү бүгүн Улуттук банк менен биргеликте өткөрүлгөн жыйындын жүрүшүндө билдиришти.
ИИМ өкүлдөрүнүн айтымында, болжол менен келтирилген зыяндын жарымын - 42 млн 145 миң сомун кылмыштын изи сууй электе аныктап, кайтарып алууга мүмкүн болгон. Бирок калган каражаттарды кайтарып алуу кыйынчылык жаратууда.
Адистер белгилегендей, көпчүлүк учурда кибер кылмыштын башкы аткаруучулары чет өлкөдө отурган адамдар тарабынан уюштурат. Алдамчылык жолу менен алынган акчалар адегенде банктык эсептерге түшүп, андан соң криптовалютага айландырылат да, чет өлкөгө чыгарылып кетет.
ИИМ өкүлүнүн билдирүүсүнө караганда, Кыргызстандын кээ бир мамлекеттер менен кызматташтыгы жок болгондуктан, кылмыштын бетин ачып, акчаны кайтарып алуу кыйынчылык жаратууда.
