1-майга чейин Кыргызстанда кимдер салык декларациясын тапшырууга тийиш
Кыргыз Республикасынын Мамлекеттик салык кызматы жарандарга жана жеке ишкерлерге бирдиктүү салык декларациясын тапшыруу мөөнөтү 1-майда аяктай тургандыгын эскертти.
Маалыматка ылайык, декларация тапшыруу милдети патент менен иштебеген же өзгөчө режимдеги аймактарда иш жүргүзбөгөн жеке ишкерлерге тиешелүү. Мындан сырткары, өлкө аймагындагы эл аралык уюмдарда жана дипломатиялык өкүлчүлүктөрдө иштеген жарандар, ошондой эле киреше салыгы кармалбаган киреше алган адамдар да отчет берүүгө милдеттүү.
Ал эми калган жарандар декларацияны өз ыктыяры менен тапшыра алышат. Бул аларга социалдык же мүлктүк чыгымдар боюнча салыктык жеңилдиктерди алууга мүмкүнчүлүк берет.
Декларация электрондук форматта гана cabinet.salyk.kg сайтындагы салык төлөөчүнүн жеке кабинети аркылуу кабыл алынат. Кошумча маалымат алуу үчүн салык органдарына кайрылууга же 116 номуруна чалууга болот.
