Президент Чоң-Алай районунун айыл чарбасына кошумча каражат бөлүнөрүн билдирди
Президент Садыр Жапаров Ош облусуна болгон иш сапарынын алкагында Чоң-Алай районунун тургундары жана активи менен жолугушту.
Мамлекет башчысы район калкынын негизги ишмердүүлүгү мал чарбачылыгы болгондуктан, фермерлерди колдоо боюнча жүргүзүлүп жаткан иштер тууралуу айтып берди.
“Айыл чарбасын каржылоо–14” долбоорунун алкагында сиздердин райондун фермерлери, дыйкандары 44 млн сом алышыптыр. Жер-жерлерде, анын ичинде сиздерде да дыйкандар насыянын көлөмүнүн аздыгын көйгөй катары көтөрүп жатышыптыр. Жергиликтүү элибиздин талаптарын орундатуу максатында бул айыл чарба багытын жеңилдетилген кредиттер менен толук камсыздоо үчүн дагы кошумча финансы каражатын бөлүүнү чечтик, тиешелүү тескеме кабыл алынды. Эми бардык дыйкан-фермерлер бул жеңилдетилген насыядан ала алышат”, - деди президент.
Мындан тышкары өлкө башчы сугат суу көйгөйүн чечүү үчүн насостук станциялар жана суу үнөмдөөчү технологияларды киргизүү иштери жүрүп жатканын белгиледи. Бүгүнкү күндө Алтын-Дара суу сактагычы (СЖБ) боюнча долборлоо иштери аткарылып жатат. Айылдарды таза суу менен камсыздоодо таза суу системасын жаңыртуу, курулуш жумуштары жакынкы мезгилдерде жасалат.
