Кыргызстандын 2026-жылдын I кварталындагы социалдык-экономикалык абалы кандай?
Улуттук статистикалык комитетинде быйылкы жылдын январь-март айларындагы Кыргызстандын социалдык-экономикалык абалынын жыйынтыктары жана 2025-жылдагы кыргыз демографиялык кырдаалы боюнча маалымат жыйын болду.
Жыйында 2026-жылдын январь-март айларында ички дүң продукт (ИДП) алдын ала баалоо боюнча 428,6 млрд сомду түзүп, 2025-жылдын январь-март айларына салыштырмалуу 10,1% өскөнү айтылды.
Өнөр жай өндүрүшүнүн өсүшү 2025-жылдын январь-март айларына салыштырмалуу төмөнкү тармактардагы өндүрүш көлөмүнүн көбөйүшү менен камсыз болгон: химиялык продукция (3,1 эсе), жыгач жана кагаз буюмдары, полиграфиялык ишмердиктин продукциясы (1,7 эсе), фармацевтикалык продукция (1,6 эсе), транспорт каражаттары (49,5%га), резина жана пластмасса буюмдары, курулуш материалдары (39,7%га), тамак-аш азыктары (суусундуктарды кошкондо) жана тамеки буюмдары (17,9%га), тазаланган мунай продуктулары (14,6%га), негизги металлдар (10,5%га), ошондой эле пайдалуу кендерди казып алуу (30,4%га) көбөйгөн.
Курулуш тармагында да оң тенденциялар байкалып, көлөмү 29,6%га өстү, дүң жана чекене соода – 12,1%га, ошондой эле айыл чарба – 2,8%га көбөйдү.
2026-жылдын январь-март айларында (өткөн жылдын декабрына салыштырмалуу) республика боюнча керектөө бааларынын жалпы өсүшү 3,3%ды түздү.
Ошол эле учурда, тамак-аш азыктары жана алкоголсуз суусундуктар 4,3%га, алкоголдук ичимдиктер жана тамеки буюмдары – 3,1%га, азык-түлүк эмес товарлар – 0,5%га, ал эми калкка көрсөтүлгөн кызматтардын тарифтери – 5,3%га жогорулады.
Керектөө бааларынын жана тарифтердин өсүшү республикадагы бардык аймактарда байкалды. Мында эң жогорку өсүш Ош облусунда катталып (7,2%), бул тамак-аш азыктары жана алкоголсуз суусундуктардын (5,4%га), азык-түлүк эмес товарлардын (5,5%га) жана калкка көрсөтүлгөн кызматтардын тарифтеринин (12,3%га) жогорулашы менен шартталды.
