Айрым өткөрмө пункттарда жүк ташуучу унааларды текшерүү убактысы кыскарды
Кыргызстандын бир катар өткөрмө пункттарында жүк ташуучу унааларды текшерүү жана каттоо убактысы кыйла кыскарды. Жүк агымы бир нече эсеге көбөйгөнүнө карабастан, бир сааттан аз убакытта контролдон өтүү көрсөткүчү жогорулагандыгын Мамлекеттик бажы кызматынан кабарлашты.
Билдирүүгө караганда, “Достук” өткөрмө пунктунда акыркы бир жыл ичинде жүк ташуучу унаалардын 1 сааттан аз убакытта өтүү үлүшү 48%дан 82%га чейин өстү. Ошол эле учурда жүк агымы да кескин көбөйүп, 2025-жылдын 1- кварталында 3842 унаа өткөн болсо, 2026-жылы ушул мезгил аралыгында бул көрсөткүч 10 миң 299га жетти.
Ошондой эле Кызыл-Кыя өткөрмө пунктунда да оң динамика байкалууда. Бул жерде 2025-жылдын 1- кварталында унаалардын 25% гана бир сааттан аз убакытта өтсө, 2026-жылы бул көрсөткүч 60%га чейин жогорулаган.
Адистердин айтымында, мындай жыйынтыктар жүк көбөйгөн шартта да чек арадан өтүү процессин ылдамдатууга мүмкүн болгонун көрсөтөт. Бул процесстерди оптималдаштыруу, мамлекеттик органдардын өз ара аракеттенүүсүн жакшыртуу жана заманбап технологияларды киргизүүнүн натыйжасы болуп эсептелет.
Бул багыттагы иштер улантылып, башка өткөрмө пункттарда да натыйжалуулукту жогорулатуу боюнча чаралар этап-этабы менен ишке ашырылмакчы.
