"Бай-Талаа" логистикалык борборуна өзбек инвесторлор кызыкдар
Экономика жана коммерция министрлигине караштуу Өзбекстан Республикасындагы Соода өкүлчүлүгү "Кыргыз Эко Экспорт" ЖЧКсы тарабынан ишке ашырылып жаткан "Бай-Талаа" логистикалык борборунун долбоорун илгерилетүү боюнча иштерди улантууда.
Ведомствонун маалыматына ылайык, Жалал-Абад облусунун Ала-Бука районунда жайгашкан бул долбоор ишке ашыруунун акыркы баскычында турат. Ал айыл чарба продукциясын кайра иштетүү, сактоо жана экспорттоо үчүн заманбап инфраструктура түзүүгө багытталган.
Долбоорду илгерилетүүнүн алкагында Соода өкүлчүлүгү Өзбекстандын ири инвестициялык компанияларынын бири — BMB Holding үчүн презентация уюштурду. Жолугушууда логистикалык борбордун мүмкүнчүлүктөрү, өнүгүү концепциясы жана айыл чарба тармагында биргелешкен ишканаларды түзүү мүмкүнчүлүктөрү тааныштырылды.
Сүйлөшүүлөрдүн жыйынтыгында өзбек тарап долбоорго кызыгуусун билдирип, кызматташууну улантууга даяр экенин белгиледи.
Мындан тышкары, Соода өкүлчүлүгү Өзбекстандын мамлекеттик жана жеке сектор өкүлдөрү менен бир катар жолугушууларды өткөрдү. Анда айыл чарба продукциясын кайра иштетүү, кошумча нарк чынжырларын өнүктүрүү, ошондой эле чийки затты жана даяр продукцияны жеткирүү багыттары боюнча кызматташуу маселелери талкууланды.
Өткөрүлгөн иш-чаралар Кыргызстан менен Өзбекстандын ортосундагы соода-экономикалык кызматташууну чыңдоого, чет өлкөлүк инвестицияларды тартууга жана агроөнөр жай комплексинин экспорттук мүмкүнчүлүктөрүн кеңейтүүгө багытталган.
