Кыргызстан PGI Fund менен жаңы инвестициялык долбоорлорду талкуулады
Экономика жана коммерция министрлигинде "Глобалдык инфраструктура жана инвестициялар боюнча өнөктөштүк" (PGI Fund) эл аралык демилгесинин өкүлдөрү менен жолугушуу болуп өттү. Бул тууралуу ведомстводон билдиришти.
Жолугушууга министрликтин өкүлдөрү, ошондой эле PGI Fund делегациясы жана АКШнын Кыргыз Республикасындагы элчилигинин өкүлдөрү катышты.
Сүйлөшүүлөрдүн жүрүшүндө тараптар транспорттук жана логистикалык инфраструктураны өнүктүрүү, инвестицияларды тартуу жана соода жол-жоболорун өркүндөтүү маселелерин талкуулашты. Өзгөчө көңүл бажы башкаруунун натыйжалуулугун жогорулатууга, процесстерди санариптештирүүгө жана административдик тоскоолдуктарды азайтууга бурулду.
PGI Fund өкүлдөрү транспорт, энергетика, санариптик инфраструктура жана агроөнөр жай тармактарында инвестициялык долбоорлорду даярдоо жана ишке ашыруу боюнча сунуштарын беришти. Бул демилгелер Транскаспий соода маршруту алкагында аймактык байланыштарды чыңдоого багытталган.
Ошондой эле тараптар соода жол-жоболорун жөнөкөйлөтүү жаатында кызматташууну мындан ары өнүктүрүү маселелерин карашты. Кыргыз тарап бул багыт мамлекеттик саясаттын артыкчылыктуу багыттарынын бири экенин белгилеп, заманбап инструменттерди киргизүүгө даяр экенин билдирди.
Жолугушуунун жыйынтыгында кыргыз тарап тарабынан конкреттүү сунуштарды иштеп чыгып, аларды PGI Fund’дун техникалык командасына кароого сунуштоо боюнча макулдашууга жетишилди. Ошондой эле демилгелерди ишке ашырууда каржылык колдоо көрсөтүү мүмкүнчүлүктөрү белгиленди.
