Кыргызстанда тамак-ашты маркалоо боюнча жаңы эрежелер каралууда
Экономика жана коммерция министрлиги 2026-жылдын 15-апрелинде тамак-аш продукциясын маркалоо боюнча техникалык регламентке өзгөртүүлөрдүн долбоорун талкуулоо максатында бизнес-түзүмдөр менен кеңешме өткөрдү.
Ведомствонун маалыматына ылайык, иш-чара Бажы бирлигинин "Тамак-аш продукциясын маркалоо" (ТР ТС 022/2011) техникалык регламентине сунушталган №4 өзгөртүүлөрдү түшүндүрүүгө багытталды.
Кеңешменин жүрүшүндө бир катар маанилүү маселелер каралды. Атап айтканда, иондоштуруучу нурлануу менен иштетилген азыктарды милдеттүү түрдө белгилөө, тамак-аштын курамын так көрсөтүү, аллергендер тууралуу маалыматтарды жаңылоо жана аларды маркалоодо көрсөтүү талаптары талкууланды.
Мындан тышкары, глютендин бар же жок экендигин белгилөө, азыктык баалуулук тууралуу маалыматтарды кеңейтүү жана бирдиктүү форматта көрсөтүү, ошондой эле канттын курамын анык көрсөтүү маселелери каралды.
Ошондой эле техникалык регламентти витаминдердин жана минералдык заттардын референстик көрсөткүчтөрү менен толуктоо сунушу айтылды.
Кеңешменин алкагында Саламаттык сактоо министрлиги тарабынан канттардын, анын ичинде кошулган канттардын көлөмүн көрсөтүү боюнча кошумча сунуштар талкууга алынды.
Бул өзгөртүүлөр керектөөчүлөргө азык-түлүк тууралуу так жана толук маалымат берүү, ошондой эле тамак-аш коопсуздугун жогорулатуу максатын көздөйт.
