Б.Төрөбаев: Өлкө боюнча 200 инвестициялык долбоор даярдалат

Күн мурун Жалал-Абад облусунда Президенттин өзгөчө тапшырмалар боюнча атайын өкүлү Бакыт Төрөбаевдин катышуусунда инвестициялык долбоорлорду түзүүгө арналган жыйын өттү. Бул тууралуу Өкмөттүн басма сөз кызматынан билдиришти.

Жыйынга Президенттин Жалал-Абад облусундагы ыйгарым укуктуу өкүлчүлүгүнүн жетекчилиги жана Чаткал, Ала-Бука, Токтогул райондорунун акимдери катышты.

Жолугушуунун негизги максаты – аймактардагы артыкчылыктуу инвестициялык долбоорлорду аныктоо, инвестициялык жагымдуулукту жогорулатуу жана экономиканы өнүктүрүүнүн бирдиктүү системасын иштеп чыгуу болду.

Бакыт Төрөбаев Президенттин тапшырмасына ылайык, өлкөнүн бардык райондорунун инвестициялык потенциалы жеринде талданып жатканын белгиледи. Анын айтымында, долбоорлордун экономикалык натыйжалуулугу, экспорттук мүмкүнчүлүктөрү жана жаңы жумуш орундарын түзүү маселелери негизги көңүл борборунда.

Ал ошондой эле Кыргызстан боюнча жалпысынан 200 инвестициялык долбоор даярдоо пландалып жатканын айтты. Бул долбоорлор энергетика, туризм, өндүрүш, медицина жана билим берүү тармактарын камтыйт.

Мындан тышкары, жергиликтүү деңгээлде ишкерлерге жана мамлекеттик кызматкерлерге долбоор жазуу жана техникалык-экономикалык негиздеме түзүү боюнча окутуулар өткөрүлөрү белгиленди.

Белгилүү болгондой, буга чейин ушундай жыйындар Ош жана Чүй облустарында өткөрүлгөн. Ал эми Жалал-Абад облусунун Сузак, Базар-Коргон, Аксы жана Ноокен райондорунда жолугушуулар улантылат.

Бул иштер Кыргыз Республикасын 2030-жылга чейин өнүктүрүүнүн Улуттук программасына ылайык аймактык инвестициялык портфелди системалуу түрдө түзүүгө багытталган.