Кыргызстанда 2,3 миң литрден ашык этил спиртин мыйзамсыз алып кирүү аракети токтотулду
Мамлекеттик бажы кызматынын кызматкерлери Евразия экономикалык бирлигинин жана КРнын бажы мыйзамдарын бузуу фактысын аныктады.
Мамлекеттик бажы кызматынын маалыматына ылайык, 2026-жылдын 27-мартында "Түндүк-Чыгыш" бажысынын Кант убактылуу сактоо кампасына Түркиядан жүк ташыган унаа келген. Документтерде сумка аксессуарлары, техникалык тетиктер, пластмасса буюмдар жана парфюмерия продукциялары көрсөтүлгөн.
Бирок бажылык текшерүүнүн жүрүшүндө декларацияланбаган 2 373 литр суюктук табылган. Thermo Fisher жабдуусу менен жүргүзүлгөн текшерүүдө бул суюктук 96% концентрациядагы этил спирти экени аныкталган. Суюктуктун курамын тактоо максатында үлгүлөр КРнын Юстиция министрлигине караштуу Соттук-эксперттик изилдөө кызматына жөнөтүлүп, анын корутундусуна ылайык да, суюктук этил спирти деп табылган.
Аталган факты боюнча тиешелүү протокол түзүлүп, товарлар жана документтер камакка алынды.
