Кыргызстанда инвестициялар 25%дан ашык өстү — I кварталдын жыйынтыгы
Инвестициялар боюнча улуттук агенттик өлкөдө инвестициялык климатты жакшыртуу жана инвесторлор үчүн жагымдуу шарттарды түзүү багытындагы системалуу ишин улантууда. Бул тууралуу аталган агенттиктен билдиришти.
Маалыматка ылайык, Улуттук статистика комитетинин жыйынтыгы боюнча 2026-жылдын биринчи кварталында өлкөдө негизги капиталга инвестициялардын туруктуу өсүшү байкалган.
Үстүбүздөгү жылдын январь–март айларында инвестициялардын жалпы көлөмү 77 млрд 319 млн сомду түзүп, өткөн жылдын ушул эле мезгилине салыштырмалуу 25,5%га жогорулаган. Ички инвестициялар 1,2 эсеге көбөйсө, тышкы инвестициялардын агымы дагы да жогорку темп менен өсүп, 1,5 эсени түзгөн.
Негизги инвестициялар кен казуу тармагындагы объекттерди курууга, кайра иштетүү өнөр жайына, транспорт жана логистика тармагына, ошондой эле энергетикалык инфраструктураны өнүктүрүүгө багытталган.
Адистер белгилегендей, мындай оң динамика инвесторлордун Кыргызстандын реалдуу секторуна жана ири инфраструктуралык долбоорлоруна болгон кызыгуусу жогору бойдон сакталып жатканын көрсөтөт.
Инвестициялык долбоорлорду коштоо жана инвесторлордун укуктарын коргоо боюнча Улуттук агенттиктин жүргүзүп жаткан иши инвестициялык активдүүлүктү арттырууга жана өлкөнүн туруктуу экономикалык өсүшү үчүн негиз түзүүгө багытталган.
