Кыргызстан мөмө-жемиш экспортун өнүктүрүүгө багыт алууда
Суу ресурстары, айыл чарба жана кайра иштетүү министрлигинде мөмө-жемиштин ири импортеру – “Ягодный союз” бирикмесинин башкы директору Игорь Бугорский менен жумушчу жолугушуу өттү. Бул тууралуу ведомстводон билдиришти.
Жолугушуунун жүрүшүндө кыргыз мөмө-жемиш багбанчылыгын өнүктүрүү жана тармактын экспорттук мүмкүнчүлүктөрүн кеңейтүү маселелери талкууланды.
Тараптар экспортко багытталган, жогорку суроо-талапка ээ алчанын жаңы сортторун өстүрүү, мөмө-жемишти туруктуу жеткирүүнү камсыз кылуу, ошондой эле заманбап агротехнологияларды киргизүү аркылуу өндүрүштүн натыйжалуулугун жогорулатуу багыттарын карашты.
Өз кезегинде “Ягодный союз” бирикмеси сапаттуу көчөттөр менен камсыз кылууга, фермерлерди жана агрономдорду заманбап агротехнологияларга окутууга, ошондой эле тармакка методикалык колдоо көрсөтүүгө даяр экенин билдирди.
Белгилей кетсек, “Ягодный союз” концерни 120дан ашуун ишкананы – багбандарды, технологдорду жана ташып-жеткирүү кызматтарын бириктирип, Россиянын мөмө-жемиш рыногунда жана агротехнология тармагында маанилүү ролду ойнойт.
Жолугушууда уюмдун мөмө-жемиштерди кайра иштетүү жана экспортко даярдоо мүмкүнчүлүктөрү жогору экени да белгиленди. Россияда мөмө-жемишке болгон суроо-талаптын жогору болушу, айрыкча тоңдурулган продукцияны экспорттоого кеңири мүмкүнчүлүк түзөт.
Жыйынтыгында тараптар кызматташууну кеңейтүүгө жана мөмө-жемиш багбанчылыгы багытында биргелешкен долбоорлорду ишке ашырууга кызыкдар экенин билдиришти.
