Кыргызстанда заманбап шаардык комплекстерди өнүктүрүү маселеси көтөрүлдү
Кечээ Инвестициялар боюнча улуттук агенттиктин директору Равшанбек Сабиров Кытай Эл Республикасынын Guipai Holding Group, Hunan Jingwei Real Estate Development Co., Ltd. компанияларынын жана "Инвесфонд Тенгри Инвест" ЖЧКсынын өкүлдөрү менен жолугушту. Бул тууралуу агенттиктен билдиришти.
Жолугушуунун жүрүшүндө тараптар Кыргыз Республикасында курулуш, кыймылсыз мүлктү өнүктүрүү жана инфраструктуралык долбоорлорду ишке ашыруу жаатындагы кызматташтык маселелерин талкуулашты.
Атап айтканда, турак жай курулушуна инвестиция тартуу, заманбап шаардык комплекстерди өнүктүрүү, ошондой эле инженердик жана социалдык инфраструктураны жакшыртуу боюнча бир катар долбоорлор каралды.
Жолугушуунун жыйынтыгында тараптар өз ара пайдалуу кызматташтыкты өнүктүрүүгө жана инвестициялык долбоорлорду ишке ашырууга кызыкдар экенин билдиришти.
