Салык кызматы мыйзамсыз дары-дармек сатуу фактысын аныктады
Бишкек шаарында салык кызматкерлери жүргүзгөн рейддин жыйынтыгында документи жок дары-дармек каражаттарын мыйзамсыз сатуу фактысы аныкталды.
Мамлекеттик салык кызматынын маалыматына ылайык, текшерүү учурунда салык каттоосу, лицензиясы жана тиешелүү коштомо документтери жок фармацевтикалык продукциялар сатылган контейнер табылган.
Жыйынтыгында 7 064 даана ар түрдүү дары-дармек жана 160 флакон этил спирти тартып алынды. Ошондой эле дары-дармектерди сактоо талаптары одоно бузулгандыгы аныкталып, бул алардын калктын саламаттыгына коркунуч жаратышы мүмкүн экени белгиленди.
Учурда чогултулган материалдар Кыргыз Республикасынын мыйзамдарына ылайык чара көрүү үчүн дары-дармек каражаттарын жана медициналык буюмдарды жүгүртүү тармагындагы ыйгарым укуктуу мамлекеттик органга өткөрүлүп берилди.
