Таңгакталган сууну маркалоодон бюджетке 2,8 млрд сом салык түштү
Мамлекеттик салык кызматынын маалыматына ылайык, 2026-жылдын январь-март айларында таңгакталган сууларга 42,7 млн эсептик-контролдук марка берилди. Маркаланган продукциянын жалпы көлөмү 95,2 млн литрди түздү.
Эсептик-контролдук маркаларды киргизүүнүн натыйжасында таңгакталган сууну, анын ичинде газдалган жана минералдык сууларды өндүрүүчүлөрдөн жана импорттоочулардан бюджетке 2,8 млрд сом салык түшкөн. Бул көрсөткүч 2025-жылдын ушул мезгилине салыштырмалуу 1,06 млрд сомго көбөйүп, өсүү 60,1%ды түздү.
Эске салсак, 2026-жылдын 1-январынан тартып ТЭИ ТН 2201 товардык позициясына кирген таңгакталган сууларга, анын ичинде минералдык жана газдалган сууларга эсептик-контролдук маркалар менен милдеттүү маркалоо киргизилген.
Ошол эле учурда маркасы жок таңгакталган суунун калдыктарын 2026-жылдын 1-июлуна чейин жүгүртүүгө уруксат берилет.
Колдонуудагы мыйзамдарга ылайык, эсептик-контролдук маркасы жок продукцияны саткандарга жоопкерчилик каралган. Тактап айтканда, 200 даанага чейинки маркасы жок продукцияны саткандарга 100 миң сом айып пул салынат. Ал эми 200 даанадан ашык продукцияны мыйзамсыз жүгүртүүгө чыгарган учурда 7 жылга чейин эркинен ажыратуу жазасы каралган.
Мамлекеттик салык кызматы ишкерлерди мыйзам талаптарын так сактоого жана маркасы жок продукцияны сатпоого, сактабоого жана жүгүртпөөгө чакырат.
