Кыргызстан Корея менен технологиялык өнөктөштүктү күчөтөт
Эл аралык кызматташууну өнүктүрүүнүн алкагында Инвестициялар боюнча улуттук агенттиктин башчысы Равшанбек Сабиров менен Түштүк Кореянын LNC Elecom Co. Ltd компаниясынын башкы директору Ли Су-Янг ортосунда өз ара түшүнүшүү жөнүндө меморандумга кол коюлду. Бул тууралуу аталган агенттиктен билдиришти.
Аталган компания жогорку технологиялык чечимдер багытында иш алып барып, кайра жаралуучу энергетика, электромобилдүүлүк, маалыматтык-коммуникациялык технологиялар жана коопсуздук системалары боюнча адистешкен.
Тактап айтканда, LNC Elecom Co. Ltd күн энергиясын өндүрүү жана энергияны сактоо системаларын долбоорлоо, электромобилдер үчүн кубаттоо инфраструктурасын түзүү жана тейлөө, программалык камсыздоону иштеп чыгуу, ошондой эле видеобайкоо жана имараттарды башкаруу системаларын киргизүү менен алектенет.
Меморандумга кол коюу жогоруда аталган тармактарда эки тараптуу кызматташууну өнүктүрүүгө, инфраструктураны жакшыртууга жана туруктуу өнүгүүгө багытталган биргелешкен долбоорлорду ишке ашырууга шарт түзөт.
