Туризмди өнүктүрүү фонду бюджетке 90 млн сомдук зыян келтирген
КРнын Башкы прокуратурасы тарабынан Экономика жана коммерция министрлигине караштуу Туризмди өнүктүрүүнү колдоо фондунун кызмат адамдары тарабынан бюджеттик каражаттарды максатсыз пайдалануу фактысы боюнча кылмыш иши козголду.
Башкы прокуратуранын маалыматына ылайык, 2022-2024-жылдар аралыгында Фонддун кызмат адамдары жеке менчик уюмдар менен туруктуу коррупциялык схеманы түзүшкөн.
Анын алкагында өлкөдө туризмди өнүктүрүү тармагында жасалма жакшы көрүнүштү калыптандыруу менен мамлекет үчүн пайдасыз болгон консультациялык кызматтарды көрсөтүү жана башка долбоорлорду ишке ашыруу боюнча келишимдерди түзүшкөн. Бирок аталган кызматтар жана долбоорлор иш жүзүндө аткарылган эмес.
Жыйынтыгында мыйзамсыз аракеттерден улам мамлекетке 90 млн сомдон ашык зыян келтирилгени белгиленди. Учурда бул иш боюнча тергөө амалдары жүрүп жатат.
