Зергерчилик тармагына колдоо: чийки зат арзандап, жеңилдетилген насыялар берилет
Кыргызстанда зергерчилик өнөр жайын өнүктүрүүгө багытталган жаңы чаралар кабыл алынды. Бул демилгелер Кыргыз Республикасынын Экономика жана коммерция министрлиги тарабынан иштелип чыгып, Кыргыз Республикасынын Министрлер Кабинети тарабынан бекитилди.
Экономика министрлигинин маалыматка ылайык, ата мекендик өндүрүүчүлөрдү колдоо максатында баалуу металлдарды сатуу тартиби өзгөртүлдү. Эми ишканалар чийки затты London Bullion Market Association белгилеген баадан 2% арзандатуу менен сатып ала алышат. Мында металлдар мамлекеттик фонддон улуттук валютада, рыноктук баада жана жеңилдик менен сунушталат.
Чийки затты алуу үчүн ишканалар атайын салыктык каттоодон өтүп, өндүрүштүк мүмкүнчүлүктөрүн тастыкташы керек. Ошондой эле сатып алуу белгиленген тартипте – өтүнмө берүү, келишим түзүү жана төлөм жүргүзүү аркылуу ишке ашырылат.
Мындан тышкары, зергерчилик тармагындагы ишкерлерге жеңилдетилген кредит берүү долбоору да ишке кирди. Ага ылайык:
- субъекттер: атайын каттоодо турган юридикалык жана жеке ишкерлер;
- суммасы: 90 млн сомго чейин;
- пайыздык чени жылдык 6% жеңилдетилген;
- 180 күнгө чейин кийинкиге калтыруу мүмкүнчүлүгү;
- мамлекеттик пайыздык чендин 9,67% бөлүгүн субсидиялайт.
Долбоорду ишке ашырууга 87,1 млн сом каралып, жалпы каржылоо көлөмү 1 млрд сомго чейин жетери күтүлүүдө. Насыяларды Элдик Банк жана АБанк аркылуу алуу мүмкүн.
