Өлкөнүн экономикасы кайсы багытта өнүгөт? Негизги план бекитилди
Министрлер Кабинетине караштуу Макроэкономикалык жана инвестициялык саясат боюнча координациялык кеңештин жыйыны өттү. Жыйын МинКаб төрагасы Адылбек Касымалиевдин жетекчилиги алдында уюштурулду. Бул тууралуу Өкмөттүн Басма сөз кызматынан билдиришти.
Жыйындын жүрүшүндө Экономика жана коммерция министрлиги тарабынан 2027–2031-жылдарга Кыргызстандын социалдык-экономикалык өнүгүүсүнүн сценарийлери сунушталып, алардын ичинен негизги макроэкономикалык багыт тандалды. Координациялык кеңештин мүчөлөрү сунушталган “Базалык” сценарийди жактырышты.
Сценарийлерди баалоо 2025-жылдагы алдын ала жыйынтыктарды, 2026-жылдын биринчи чейрегиндеги макроэкономикалык көрсөткүчтөрдү, ошондой эле ички жана тышкы факторлордун таасирин эске алуу менен жүргүзүлдү. Мында экономиканын негизги тармактарындагы учурдагы тенденциялар, инвестициялык активдүүлүк жана ички суроо-талап да талдоого алынган.
Маалыматка ылайык, акыркы мезгилде өнөр жай, курулуш жана кызмат көрсөтүү тармактары экономикалык өсүшкө негизги салым кошууда. Ошол эле учурда туруктуу өсүштү камсыз кылуу үчүн макроэкономикалык туруктуулукту сактоо жана инвестицияларды көбөйтүү зарылдыгы белгиленди.
Белгилей кетсек, 2030-жылга чейинки өнүгүү программасында ички дүң продуктунун (ИДП) туруктуу өсүшүн камсыз кылуу негизги максаттардын бири болуп саналат.
