Зергерлерге 90 млн сомго чейин жеңилдетилген насыя берилет
Кыргызстанда зергерчилик тармагын өнүктүрүүгө багытталган жаңы колдоо чаралары ишке кирди. Өлкөдө ата мекендик өндүрүүчүлөр үчүн мурда болуп көрбөгөндөй мүмкүнчүлүктөрдү ачкан эки маанилүү токтом кабыл алынды. Бул тууралуу Экономика жана коммерция министрлигинен билдиришти.
Жаңы чечимдердин негизинде зергерлер эми баалуу металлдарды Мамлекеттик фонддон дүйнөлүк баага (LBMA) салыштырмалуу 2% арзандатуу менен сатып ала алышат. Мындан тышкары, төлөмдөр улуттук валюта — сом менен жүргүзүлөт. Бул механизм ишкерлерге чийки затты жеткиликтүү баада алуу менен өндүрүш чыгымдарын азайтууга жана атаандаштыкка жөндөмдүүлүгүн жогорулатууга шарт түзөт.
Ошондой эле тармакты модернизациялоо жана өндүрүштү кеңейтүү максатында жеңилдетилген насыялоо программасы ишке киргизилди. Жалпы көлөмү 1 миллиард сомду түзгөн бул демилгенин алкагында ишкерлер "Элдик Банк" жана "АБанк" аркылуу 5 жылга чейинки мөөнөткө, жылдык 6% үстөк менен 90 миллион сомго чейин насыя ала алышат. Бул каражаттар жаңы жабдууларды сатып алууга, технологияларды жаңылоого жана өндүрүштү кеңейтүүгө багытталат.
Адистердин баамында, бул реформалар зергерчилик тармагын жаңы деңгээлге көтөрүп, ички рынокту өнүктүрүү менен катар экспорттук потенциалды да жогорулатат. Мындан тышкары, жаңы жумуш орундарын түзүүгө жана чакан, орто бизнести колдоого олуттуу салым кошот.
Зергерлер үчүн түзүлгөн бул мүмкүнчүлүктөр тууралуу кеңири маалыматты жана колдоону алуу жолдорун видеодон көрө аласыз.
