Кыргызстан–Кытай кызматташтыгы “жашыл өнүгүү” багытында жаңы деңгээлге чыгууда
Президенттин өзгөчө тапшырмалар боюнча атайын өкүлү Бакыт Төрөбаев Кытай Эл Республикасына болгон жумуш сапарынын алкагында Нинбо шаарында өткөн ШКУнун “Жашыл жана туруктуу өнүгүү” форумуна катышты. Бул тууралуу Президенттик администрациядан билдиришти.
Ал өз сөзүндө Кыргызстан “жашыл” жана туруктуу өнүгүү моделине өтүүгө өзгөчө маани берерин белгилеп, экологиялык туруктуулук өлкөнүн узак мөөнөттүү экономикалык өсүшүнүн негизги фактору экенин айтты.
Иш сапардын жүрүшүндө Төрөбаев Кытай Эл саясий консультативдик конференциясынын Улуттук комитетинин вице-төрагасы Шен Юэюэ менен жолугушуп, эки тараптуу кызматташтыкты талкуулады. Тараптар Кыргызстан менен Кытайдын стратегиялык өнөктөштүгүн мындан ары өнүктүрүүгө кызыкдар экенин билдиришти.
Мындан тышкары, Нинбо жана Вэнчжоу шаарларында бизнес-форумдар өткөрүлүп, анда Кыргызстандын инвестициялык мүмкүнчүлүктөрү, энергетика тармагындагы долбоорлор жана эки өлкөнүн ишкер чөйрөлөрүнүн кызматташуу перспективалары сунушталды.
