Мамлекеттик мүлктү менчиктештирүү тууралуу мыйзамга өзгөртүүлөр 1-окууда кабыл алынды
Бүгүн Жогорку Кеңеште мамлекеттик менчикти менчиктештирүү жөнүндө мыйзамга өзгөртүүлөрдү киргизүү боюнча мыйзам долбоору биринчи окууда кабыл алынды.
КРнын Экономика жана коммерция министринин орун басары Биназир Нурланова баяндама жасап, документ менчиктештирүү процессин укуктук жактан өркүндөтүү, ачык-айкындуулукту жана натыйжалуулукту жогорулатуу максатында иштелип чыккандыгын белгиледи.
Анын айтымында, сунушталган өзгөртүүлөргө ылайык мамлекеттик кыймылдуу мүлктү ажыратууну өзүнчө жөнгө салуу каралууда. Ошондой эле коррупциялык жана соттук тобокелдиктер жогору болгон айрым ыкмалар, атап айтканда - экинчи конкурс аркылуу сатуу жана кийин сатып алуу укугу менен берүү же ижарага берүү механизмдери алып салынат.
Маалыматка ылайык, мыйзам долбоорун кабыл алуу менчиктештирүү процесстеринин ачыктыгын жогорулатууга, коррупциялык тобокелдиктерди азайтууга, административдик чыгымдарды кыскартууга жана катышуучулар үчүн маалыматка тең жеткиликтүүлүктү камсыздоого мүмкүндүк берилет.
Талкуу маалында депутаттар Чынгыз Ажибаев жана Таалайбек Сарыбашов мүлктү баалоо тартибин такташты. Буга Мамлекеттик мүлктү башкаруу агенттигинин директорунун биринчи орун басары Замирбек Кененбаев баалоо көз карандысыз баалоочулар тарабынан жүргүзүлөрүн билдирди.
Депутат Гуля Кожокулова мыйзам долбоорун демилгелөөнүн максатка ылайыктуулугу тууралуу маселени көтөрүп, менчиктештирүү процессинин ачык-айкындуулугун жогорулатуу зарылдыгына көңүл бурду.
Жыйынтыгында мыйзам долбоору биринчи окууда кабыл алынды.
