Дүйнө жүзүндө азык-түлүккө болгон баалар жогорулады
БУУнун азык-түлүк жана айыл чарба уюму өткөн жума күнү жарыяланган баяндамасында билдиргендей, азык-түлүк товарларынын дүйнөлүк бааларынын эталондук көрсөткүчүнүн апрелде үчүнчү ай катары менен өсүшү мунайдын кымбатташына жана Жакынкы Чыгыштагы кырдаалдан улам келип чыккан үзгүлтүктөргө байланыштуу болду.
FAOнун жалпы индекси апрель айында орто эсеп менен 130,7 пунктту түздү. Бул март айындагы кайра каралган көрсөткүчтөн 1,6 пайызга жана өткөн жылдын ушул мезгилине салыштырмалуу 2,0 пайызга көп.
Буудайдын дүйнөлүк баалары апрелде 0,8 пайызга көтөрүлдү, буга 2026-жылы айдоо аянттары кыскарат деген божомолдор да түрткү берди.
Анткени, Ормуз кысыгындагы кризис мунайды эле эмес, жер семирткичтерди да кымбаттатгандыктан, дыйкандар жер семирткичти буудайга салыштырмалуу аз талап кылган өсүмдүктөргө өтүүдө.
Күрүч баасынын индекси да апрелде 1,9%га жогорулаган, буга мунайдын кымабатташынан улам күрүч экспорттоочу өлкөлөрдүн көпчүлүгүндө өндүрүш жана маркетинг чыгымдарынын көбөйгөнү түрткү берген.
FAOнун өсүмдүк май боюнча баа индекси март айына салыштырмалуу 5,9 пайызга жогорулап, 2022-жылдын июль айынан берки эң жогорку деңгээлге жетти.
Уй этинин дүйнөлүк баалары да эң жогорку чекке чыкты. Бул дүйнөнүн ири эт өндүрүүчүлөрүнүн бири - Бразилияда сойула турган малдын чектелүү болушунан улам экспорттук баалардын жогорулашы менен шартталды.
FAOнун сүт азыктарынын баа индекси март айына салыштырмалуу 1,1 пайызга төмөндөдү. Буга негизинен Европа Биримдигинде сүттүн мол болушу жана Океания чөлкөмүндө сезондун аягындагы өндүрүштүн күтүлгөндөн көптүгү таасирин тийгизди.
