Кытайдын ири курулуш компаниясы Кыргызстандагы долбоорлорго кызыгууда
Бүгүн Инвестициялар боюнча улуттук агенттиктин башчысы Равшанбек Сабиров Кытайдын China Construction Third Engineering Bureau компаниясынын өкүлдөрү менен жолугушуу өткөрдү. Бул тууралуу аталган агенттиктен билдиришти.
Жолугушууда тараптар инвестициялык кызматташтыкты өнүктүрүү жана Кыргызстанда биргелешкен инфраструктуралык долбоорлорду ишке ашыруу мүмкүнчүлүктөрүн талкуулашты.
Равшанбек Сабиров Кыргызстан Кытай Эл Республикасы менен стратегиялык өнөктөштүктү чыңдоого өзгөчө маани берерин белгиледи. Анын айтымында, өлкө транспорттук инфраструктура, энергетика, логистика жана өнөр жай тармактарындагы ири долбоорлорду ишке ашырууга эл аралык компанияларды тартууга кызыкдар.
Өз кезегинде China Construction Third Engineering Bureau компаниясынын өкүлдөрү Кыргызстандагы ишмердүүлүгүн кеңейтүүгө жана артыкчылыктуу инвестициялык долбоорлорго катышууга кызыкдар экенин билдиришти. Айрыкча транспорттук коридорлорду жана инфраструктуралык объекттерди өнүктүрүү маселелерине көңүл бурулду.
Жолугушуунун жыйынтыгында тараптар кызматташтык боюнча диалогду улантуу жана конкреттүү багыттарды биргелешип иштеп чыгуу боюнча макулдашышты.
