Кыргызстанда ири канаттуулар долбооруна 1,7 млрд сом инвестиция салынат
Бүгүн Инвестициялар боюнча улуттук агенттиктин башчысы Равшанбек Сабиров жана "Агро Куш" компаниясынын башкы директору Аскат Абдрахманов инвестициялык макулдашууга кол коюшту.
Агенттиктин маалыматына ылайык, макулдашууга ылайык, Чүй облусунун Кемин районунда иштеп жаткан канаттуулар комплексин кеңейтүү долбоору ишке ашырылат.
Долбоордун алкагында эки кошумча өстүрүү аянтчасында 24 канаттуулар багылуучу имарат курулат. Ошондой эле саатына 30 тонна кубаттуулуктагы канаттуулар үчүн тоют өндүрүүчү завод салынат.
Долбоорго жалпы 1,7 миллиард сомдон ашык инвестиция тартылары белгиленди.
Маалыматка ылайык, бул долбоор агроөнөр жай тармагын өнүктүрүүгө, өндүрүштүк кубаттуулуктарды көбөйтүүгө жана жаңы жумуш орундарын түзүүгө багытталган.
