Инвесторлор үчүн жаңы мүмкүнчүлүктөр: Кыргызстанда мыйзамдык база күчөтүлөт
Инвестициялар боюнча улуттук агенттиктин башчысынын орун басары Жалын Жээналиев Кыргыз Республикасындагы Эл аралык финансы корпорациясынын (IFC) өкүлчүлүгүнүн жетекчиси Дмитрий Пятаченко жана Дүйнөлүк банк тобунун өкүлдөрү менен жолугушуу өткөрдү.
Агенттиктин маалыматына ылайык, жолугушуунун жүрүшүндө тараптар венчурдук каржылоо жөнүндө мыйзам долбоорун илгерилетүү, ошондой эле инвестициялоонун альтернативдүү булактарын өнүктүрүү маселелерин талкуулашты.
Жалын Жээналиев өнөктөштөргө кызматташтыгы жана колдоосу үчүн ыраазычылык билдирип, заманбап жана туруктуу укуктук базаны түзүү инновациялык экономиканы өнүктүрүүдө өзгөчө мааниге ээ экенин белгиледи.
"Венчурдук инвестициялар жогорку технологиялык тармактарды өнүктүрүүнүн жана жеке капиталды тартуунун негизги факторлорунун бири болуп саналат", — деди ал.
Өз кезегинде IFC өкүлдөрү Казакстан жана Өзбекстандын венчурдук экосистемаларды өнүктүрүүдөгү тажрыйбалары менен бөлүшүп, инвестициялык ресурстарга жеткиликтүүлүктү кеңейтүүгө багытталган заманбап каржылык механизмдер тууралуу маалымат беришти.
Жолугушуунун жыйынтыгында тараптар мыйзам чыгаруу демилгелерин алдыга жылдыруу боюнча биргелешкен аракеттерди координациялоого жана эксперттик, аналитикалык, техникалык колдоону күчөтүүгө даяр экендиктерин билдиришти.
Белгиленген чаралар инвестициялык климатты жакшыртууга, туруктуу финансылык рынокту түзүүгө жана Кыргызстандагы стартаптар менен венчурдук экосистеманын өнүгүшүнө өбөлгө түзөрү айтылды.
