Кыргызстан менен Корея соода-экономикалык алаканы бекемдөөнү көздөөдө
Инвестициялар боюнча улуттук агенттикте Кореянын Соода жана инвестицияларды илгерилетүү агенттигинин өкүлдөрү менен жолугушуу өттү.
Агенттиктин маалыматына ылайык, жолугушууга КМШ өлкөлөрү боюнча аймактык директор Хон Дуён, Алматы филиалынын директору Ким Джунг-хун жана КМШ өлкөлөрү боюнча аймактык директордун орун басары Йе Гван Хо катышты.
Тараптар Кыргыз Республикасы менен Корея Республикасынын ортосундагы соода-экономикалык жана инвестициялык кызматташтыкты өнүктүрүү, ошондой эле кореялык компаниялар жана инвесторлор менен өз ара аракеттенүүнү кеңейтүү маселелерин талкуулашты.
Улуттук агенттиктин өкүлдөрү Кыргызстандын инвестициялык потенциалын, инвестициялык климатты жакшыртуу боюнча жүргүзүлүп жаткан реформаларды жана инвесторлорду мамлекеттик колдоо чараларын тааныштырышты. Ошондой эле инвестицияларды тартуунун артыкчылыктуу багыттары, анын ичинде мамлекеттик-жеке өнөктөштүк долбоорлору тууралуу маалымат берилди.
Өз кезегинде Кореянын Соода жана инвестицияларды илгерилетүү агенттигинин өкүлдөрү Кыргызстан менен кызматташууну чыңдоого кызыкдар экенин билдиришти. Алар өлкөнүн инвестициялык мүмкүнчүлүктөрүн Түштүк Кореянын бизнес-коомчулугу арасында илгерилетүүгө жана эки өлкөнүн ишкерлеринин ортосунда түз байланыштарды түзүүгө көмөктөшүүгө даяр экенин белгилешти.
Жолугушуунун жыйынтыгында тараптар инвестициялык жана соода-экономикалык кызматташууну кеңейтүүгө багытталган биргелешкен демилгелерди ишке ашырууга даяр экенин билдиришти.
