Кыргызстан менен Кытай “Торугарт” жана “Эркечтам” боюнча макулдашууларды талкуулады
Министрлер Кабинетинин төрагасынын орун басары – Суу ресурстары, айыл чарба жана кайра иштетүү өнөр жайы министри Эрлист Акунбеков Кытай Эл Республикасынын Синьцзян-Уйгур автономиялуу районунун Элдик өкмөтүнүн төрагасы Эркин Тунияз менен видео байланыш форматында сүйлөшүү жүргүздү. Бул тууралуу Өкмөттүн Басма сөз кызматынан билдиришти.
Жолугушууга Кыргызстан менен Кытайдын тиешелүү мамлекеттик органдарынын өкүлдөрү катышканын өкмөттөн билдиришти.
Сүйлөшүүнүн жүрүшүндө тараптар Кыргызстан менен Кытайдын мамлекеттик чек арасындагы “Торугарт” жана “Эркечтам” көзөмөл өткөрүү пункттарынын өткөрүү жөндөмдүүлүгүн жогорулатуу маселесин талкуулашты.
Мындан тышкары, Кыргызстандан Кытайга айыл чарба продукцияларын экспорттоону өнүктүрүү жана илгерилетүү маселесине өзгөчө көңүл бурулду. Маалыматка ылайык, учурда эки өлкөнүн ортосунда айыл чарба продукциясынын ар кандай түрлөрүн экспорттоо боюнча 17ге жакын протоколго кол коюлган.
Тараптар ошондой эле өз ара соода жүгүртүүнү кеңейтүү максатында Ош аэропортунда жүк кампасын түзүү маселесин да карашты.
Жолугушууда учурда курулушу активдүү жүрүп жаткан “Барскоон–Бедел” автожолуна байланышкан маселелер дагы көтөрүлдү. Атап айтканда, жол курууга керектелүүчү атайын техникаларды, курулуш жабдыктарын жана башка жүктөрдү Кыргызстандын аймагына өткөрүү үчүн убактылуу жол уюштуруу маселеси талкууланды.
Сүйлөшүүнүн соңунда тараптар соода-экономикалык кызматташтыкты, транспорттук-логистикалык байланыштарды жана башка тармактардагы өнөктөштүктү мындан ары да чыңдоо боюнча биргелешип иш алып барууга даяр экенин белгилешти.
