Кыргызстан менен Татарстан туризм жана соода тармагындагы кызматташтыкты күчөтөт
Министрлер Кабинетинин төрагасынын биринчи орун басары Данияр Амангельдиев Казань шаарындагы "Россия — Ислам дүйнөсү: KazanForum 2026" эл аралык экономикалык форумунун алкагында Татарстан Республикасынын Раиси Рустам Минниханов менен жолугушту.
Жолугушууда тараптар кыргыз-татарстандык кызматташтыктын учурдагы абалын жана аны кеңейтүү мүмкүнчүлүктөрүн талкуулашты. Данияр Амангельдиев Кыргызстан аймактар аралык байланыштарды өнүктүрүүгө өзгөчө маани берерин белгилеп, Татарстанды негизги экономикалык өнөктөштөрдүн бири катары атады.
Ошондой эле ал татарстандык тарапты алдыдагы Дүйнөлүк көчмөндөр оюндарына жана июнь айында Чолпон-Ата шаарында өтө турган Ысык-Көл эл аралык форумуна катышууга чакырды. Анын айтымында, Татарстандын спортчуларынын жана делегациясынын көчмөндөр оюндарына катышуусу эки элдин тарыхый жана маданий жакындыгын көрсөтөт.
Тараптар туристтик тармактагы кызматташтыкты дагы талкуулашып, тоо лыжа туризмин өнүктүрүүгө көңүл бурушту. Бул багытта Кыргызстан менен Татарстандын тажрыйба алмашуусу маанилүү экени белгиленди.
Өз кезегинде Рустам Минниханов Кыргызстанды боордош өлкө катары бааларын айтып, Президент Садыр Жапаровго жана Министрлер Кабинетинин Төрагасы Адылбек Касымалиевге урмат-сыйын жолдоду.
“Бизди тарых, ишеним жана каада-салттар бириктирет. Соода-экономикалык кызматташтыкта чоң мүмкүнчүлүктөр бар жана биз аны өнүктүрүүгө даярбыз”, — деди Татарстан Раиси.
Мындан тышкары, жолугушууда экологиялык кызматташтык, анын ичинде илбирсти сактоо маселеси дагы көтөрүлдү. Татарстан тарап Кыргызстандын биоартүрдүүлүктү жана тоо экосистемаларын коргоо демилгелерин колдоорун билдирди.
Жолугушуунун соңунда тараптар эки тараптуу кызматташтыкты мындан ары да тереңдетүүгө даяр экендиктерин ырасташты.
