Кыргызстанда 278 миңден ашуун жаран кредит алууга өзүнө-өзү тыюу салды
2025-жылдын 1-ноябрынан 2026-жылдын 15-майына чейин 278 135 адам «Түндүк» мобилдик тиркемеси аркылуу кредит алууга өзүнө-өзү тыюу салуу кызматын иштетти. Бул тууралуу Кыргыз Республикасынын Улуттук банкынын басма сөз кызматынан билдиришти.
Аталган кызмат жарандарды алдамчылык аракеттерден жана алардын атына мыйзамсыз насыя таризделишинен коргоо максатында ишке киргизилген. Өзүнө-өзү тыюу салуу механизми аркылуу жаран каалаган учурда өзүнүн атына жаңы кредит берүүгө убактылуу бөгөт коё алат жана тескерисинче бөгөттү жокко чыгара алат.
Кызмат 2025-жылдын ноябрь айында «Түндүк» мобилдик тиркемесинде жеткиликтүү болуп, санариптик коопсуздукту күчөтүү багытындагы чаралардын бири катары киргизилген. Бул функция өзгөчө жарандардын жеке маалыматтарын колдонуу менен мыйзамсыз кредит алуу учурлары көбөйгөн шартта актуалдуу болгон.
Өзүнө-өзү тыюу салуу кызматын кошкондон кийин банктар жана башка каржы уюмдары жарандын атына жаңы насыя бере албай калат. Эгер жаран кайрадан кредит алуу чечимин кабыл алса, анда ал тыюуну өзү эле тиркеме аркылуу алып сала алат.
Улуттук банк бул кызмат жарандардын финансылык коопсуздугун камсыздоодо маанилүү инструмент болуп калганын белгилеп, калкты санариптик кызматтарды активдүү колдонууга чакырууда.
