Кыргызстанда ирригация системасын жаңылоого 16 млрд сом инвестиция тартылат
Кыргызстандын суу чарба инфраструктурасын жаңылоого багытталган “Ирригацияга инвестициялоонун улуттук программасынын” алкагында 16 млрд сомдон ашуун инвестиция тарткан долбоорлорго кол коюлат. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Иш-чаранын алкагында Нарын облусунун Ат-Башы районундагы “Өмүкө” чарбалар аралык сугат каналын, ошондой эле Талас облусундагы Бакай-Ата жана Айтматов райондорун суу менен камсыз кылган Көкүмбек Таштаналиев атындагы Чоң Талас каналын модернизациялоо маселелери сунушталат.
Долбоорлор ишке ашкандан кийин 15 миң гектардан ашуун айдоо жерлери кошумча сугат суу менен камсыз болуп, 67 миңден ашуун калк түздөн-түз сугат суусуна жетет.
“Ирригацияга инвестициялоонун улуттук программасы” ирригациялык системаларды жаңылоого, суу ресурстарын натыйжалуу башкарууга жана айыл чарба өндүрүшүнүн туруктуулугун жогорулатууга багытталган.
Программанын алкагында 440 чакырымдан ашуун суу каналдары жана дренаждык инфраструктура реконструкцияланып, 82 миң гектар айдоо жеринин сугат шарттары жакшыртылат.
Долбоордун жалпы көлөмү 193 млн АКШ долларын түзөт. Ал Дүйнөлүк банктын колдоосу менен 6 жыл ичинде ишке ашырылат.
Адистердин айтымында, бул демилге суу тартыштыгы жана климаттык өзгөрүүлөр шартында өлкөнүн азык-түлүк коопсуздугун камсыз кылууга жана айыл чарба тармагынын туруктуулугун бекемдөөгө көмөк көрсөтөт.
