Кыргызстанда Кореянын катышуусундагы туруктуу агроөнөржай борбору ачылат
Кыргызстанда заманбап агротехнологияларды жана экологиялык таза өндүрүштү өнүктүрүүгө багытталган жаңы агроөнөржай борбору ачылат. Аталган комплекс 18-майдан тарта ишин баштайт, ал эми анын расмий ачылышы 20-майда өтөт.
Бул тууралуу айыл чарба илимдеринин кандидаты, мурдагы айыл чарба министри Таалайбек Айдаралиев 1-радиого берген маегинде билдирди.
Анын айтымында, бул борбор Кореянын экологиялык жана жаратылышты коргоо жагынан дүйнөдөгү эң алдыңкы технологиялар менен камтылган жабдуулар жана продукцияларын үзгүлтүксүз алууга мүмкүн болгон көргөзмө жарманке катары сунушталат.
“Акыркы 3-4 жылдан бери биз Корея мамлекетиндеги инвесторлорду тартуу максатында өнөктөштөрдү даярдап келгенбиз. Кыргызстанда эле эмес дүйнө жүзү боюнча да үзгултүксүз иштей турган жарманке болбоптур. Буга чейин агроөнөр жай шаймандары, күнөскана шаймандары Кыргызстанга ортомчулар аркылуу алып келинип жаткан. Эми биз ортомчуларды жокко чыгарып, Кыргызстанга түз жеткирүүчү борбор ачалы, деп жатабыз. Көргөзмө жарманкеге 250 млн $ жүгүртүү каражаты бар, Кореядан келген 40 жакын агроөнөржай компаниялар жана 20 жакын өнөр жай компаниялар катышат” – деп билдирди Таалайбек Айдаралиев.
Адистин айтымында, бул борбор “Ак бата” жаңы конушундагы эски күнөскананын ордунда 1 гектар аянтта жайгашкан. Ал жер кайрадан оңдоп түзөтүүдөн өтүп, чакан жери күнөскана болуп, калган аймагын 60 компаниянын жабдуулары ээлемекчи.
Борбордон сатып алуучулар тырмоочтон баштап жаратылышка зыяны жок агропродукциянын турлөрү сатып ала алышат. Мындан сырткары борбордо жок агроөнөржай шайманын же продукцияны буйрутма кылып, ортомчулар жок эле Кореядан түз сатып алууга шарт түзүлөт.
