Кыргызстанда күйүүчү майдын запасы 1,5 айга жетет
Кыргызстанда күйүүчү-майлоочу майлардын запасы учурда 1–1,5 айга жетет. Бул тууралуу нефть трейдерлеринин маалыматына таянып Монополияга каршы жөнгө салуу кызматы билдирди.
Маалыматка ылайык, өлкөгө мунай заттарын жеткирүү Кыргызстан менен Россиянын ортосундагы өкмөттөр аралык макулдашуунун алкагында жүргүзүлүүдө. Кыргызстандын жылдык муктаждыгы болжол менен 1,6 млн тоннаны түзөт.
Белгиленгендей, 2023-жылы Монополияга каршы жөнгө салуу кызматы менен ири нефть трейдерлеринин ортосунда кызматташуу тууралуу макулдашууга кол коюлган. Ага ылайык, компаниялар күйүүчү майдын баа жана физикалык жеткиликтүүлүгүн камсыздап, ички рынокто тартыштыкка жол бербөөгө макулдашышкан.
Учурда кызмат тарабынан май куюучу станциялардагы бааларга күн сайын мониторинг жүргүзүлүп, ЕАЭБ жана башка өлкөлөрдөгү баалар менен салыштыруу жүргүзүлүп турат.
Маалыматта Кыргызстандагы күйүүчү майдын баасы Армения, Тажикстан жана Өзбекстанга салыштырмалуу төмөн экени, ал эми Россия жана Казакстанга караганда жогору экени айтылды.
Ошондой эле өлкөдөгү абал Россиядан күйүүчү майдын туруктуу жеткирилип турушу менен байланыштуу экени белгиленди.
