Түркиялык ZENA Enerji компаниясы Кыргызстан менен кызматташууга кызыкдар

Экономика жана коммерция министри Бакыт Сыдыков Түркиянын ZENA Elektrik ve Enerji Anonim Şirketi компаниясынын жетекчиси Йүксел Чагры Гүрсес менен жолугушту. Бул тууралуу Экономика жана коммерция министрлигинен билдиришти.

Жолугушууда тараптар кыргыз-түрк соода-экономикалык кызматташтыгын кеңейтүү жана Кыргызстандагы инвестициялык мүмкүнчүлүктөрдү талкуулашты.

Бакыт Сыдыков өлкөдө инвестициялык климатты жакшыртуу жана бизнес жүргүзүүгө ыңгайлуу шарттарды түзүү боюнча иштер жүрүп жатканын белгилеп, жашыл энергетиканы өнүктүрүүгө өзгөчө көңүл бурулуп жатканын айтты.

Министр Кыргыз Республикасы ZENA Enerji компаниясынын инвестициялык долбоорлорун колдоого даяр экенин билдирди.

Өз кезегинде компания жетекчиси Йүксел Чагры Гүрсес Кыргызстандагы инвестициялык жана ишкердик мүмкүнчүлүктөргө кызыгуусу артканын белгиледи.

Жолугушуунун жыйынтыгында тараптар ишкердик байланыштарды активдештирүү жана эки өлкөнүн соода-экономикалык кызматташтыгын мындан ары чыңдоо боюнча макулдашышты.