2026-жылдын январь-апрелинде ИДП өсүүсү камсыздалды
Ички дүң продукт (ИДП) алдын-ала баалоо боюнча 2026-жылдын январь-апрелинде өткөн жылдын январь-апрелине салыштырмалуу 12,4% жогорулоо менен 602,8 млрд. сомду түздү. Бул тууралуу Улуттук статистика комитетинен маалымдашты.
Билдирүүгө караганда, ИДПнын өсүшү товардык өндүрүш, кызмат көрсөтүүчү тармактар жана продукттарга болгон таза салыктар тарабынан камсыздалды. Муну менен бирге, товардык өндүрүш тармактарынын өсүү темпи мурунку жылдын январь-апрелине салыштырмалуу 23,0%, кызмат көрсөтүүчү тармактардын өсүү темпи 7,2% , ал эми продукттарга болгон таза салыктар 11,5% жогорулады.
ИДПнын түзүмүндө кызмат көрсөтүүчү тармактарынын үлүшү 50,3% туура келип, мурунку жылдын январь-апрелине салыштырмалуу 4,9 пайыздык пунктка тѳмѳндѳгѳн, ошол эле учурда товарларды өндүрүүчү тармактардын үлүшү тескерисинче 4,2 пайыздык пунктка жогорулап 33,1%ды түздү. Мында курулуштун үлүшү мурунку жылдын ушул мезгилине салыштырмалуу 2,5 пайыздык пунктка, өнөр жай 2,2 пайыздык пунктка жогорулаган, ал эми айыл чарбасынын үлүшү тескерисинче 0,5 пайыздык пунктка кыскарган.
💡
Келтирилген маалыматтар, 2008-жылдагы Улуттук Эсептер Тутумунун эл аралык стандарттарына ылайык эсептелген. ИДПга алдын-ала баа берүүлөрдү эсептөө экономиканын өнүгүү тенденциясын мүнөздөйт, ал ыкчамдыкты камсыз кылуу үчүн жүргүзүлөт жана негизги тармактар: айыл чарба, өнөр жай, курулуш, соода, мейманканалар жана ресторандар, транспорт жана байланыш боюнча өндүрүш индекстеринин өзгөрүшүнө негизделет. ИДПнын түзүмүндө көрсөтүлгөн тармактардын үлүшү болжол менен 55% ды түзөт.
