Данияр Амангелдиев: Экономиканын өсүү темпи 10%дан төмөндөгөн жок
Кыргызстандын экономикасы акыркы беш жылдан бери туруктуу өсүштү көрсөтүп, жылдык өсүү темпи 10%дан төмөн түшкөн жок. Бул тууралуу Министрлер кабинетинин төрагасынын биринчи орун басары Данияр Амангелдиев “Биринчи радионун” “Ачык кабинет” программасында билдирди.
Анын айтымында, 2026-жылдын алгачкы төрт айындагы статистикалык маалыматтар боюнча өлкөнүн ички дүң продукциясынын көлөмү 602,8 млрд сомдон ашкан.
“Бул өсүү темпи былтыркы жылга салыштырмалуу 12,4 пайызга чейин жетип, динамикасы жакшы деп эсептелет. Эң негизги өсүштөр - курулуш тармагы, өндүрүш тармагы, кызмат көрсөтүү тармагы жана айыл-чарбасы дагы жакшы көрсөткүчтөрдү берип келе жатат”, — деди ал.
Минкаб өкүлүнүн айтымында, жыл башынан бери ири өндүрүш ишканаларын колдоо үчүн каржылык жана административдик шарттар түзүлүп, жыл сайын 100дөн кем эмес ишканалар ачылып жатат. Азыркы учурда орто жана чакан бизнеске, айрыкча тигүү тармагына өзгөчө көңүл бурулууда. Бул багытта Президенттин түз тапшырмасы менен жеңилдетилген каржылоо механизмдери ишке киргизилген.
“Азыр банк тармагында 20 пайыздык чен болуп жаткандыктан, ишкерлерди колдоо үчүн аны 10 пайызга чейин түшүрүүнү сунуштаганбыз. Бирок Президент бул тармакка өзгөчө көңүл буруп, өз фондунун эсебинен пайыздык ченди “нөлгө” чейин түшүрүүнү тапшырган”, — деди Амангелдиев.
Анын айтымында, тигүү тармагында экспорт, сертификация жана ишкердикти легалдаштыруу маселелери да актуалдуу бойдон калууда. Бул үчүн Экономика жана коммерция министрлигинин алдында атайын жардам берүүчү кабинет ачылган.
Мындан тышкары, 2026-жылга карата өнүктүрүү программасынын алкагында пайыздык чендерди субсидиялоо механизми дагы каралган.
“Биринчи этапта 300 млн сом бөлүнгөн. Биринчи кварталдын ичинде эле бул каражатка суроо-талап жогору экени далилденди. Каражат толук өздөштүрүлгөндөн кийин дагы кошумча 300 млн сом каралды”, — деп кошумчалады Данияр Амангелдиев.
