Кыргызстанда ички дүң продукция 12,4%га өстү
Министрлер Кабинетинин төрагасы Адылбек Касымалиев Президенттин Администрациясында аппараттык жыйын өткөрдү. Бул тууралуу Өкмөттүн Басма сөз кызматынан билдиришти.
Жыйындын жүрүшүндө МинКаб башчысы 2026-жылдын январь-апрель айларындагы өлкөнүн социалдык-экономикалык көрсөткүчтөрүнө токтолду.
Анын айтымында, алдын ала эсептөөлөр боюнча ички дүң продукциянын көлөмү 602,8 миллиард сомду түзүп, өткөн жылдын ушул мезгилине салыштырмалуу 12,4%га өскөн.
Ошондой эле курулуш тармагындагы өсүш 72,8%ды, өнөр жай тармагында 14,7%ды, кызмат көрсөтүү секторунда 7,2%ды жана айыл чарба тармагында 3%ды түзгөнү белгиленди.
Мындан тышкары, негизги капиталга инвестициялардын көлөмү 128,6 миллиард сомго жетип, 69,7%га өскөн. Бул көрсөткүч ички жана тышкы каржылоо булактарынын көбөйүшү менен байланыштуу экени айтылды.
Аппараттык жыйында өкмөттүк акселераторлордун алкагында үч жаңы реформага старт берилди. Алар:
- чет өлкөлөрдө формалдуу эмес сектордо иштеген эмгек мигранттары үчүн мамлекеттик пенсиялык камсыздандырууга жеткиликтүүлүктү кеңейтүү;
- медициналык жана фармацевтикалык ишмердүүлүктү лицензиялоону жөнөкөйлөтүү;
- мектеп окуучуларын профилактикалык кароодон өткөрүү жана оорулар боюнча каттоону санариптештирүү.
Ошондой эле “Инвестициялар” автоматташтырылган маалыматтык системасы жана сыйлыктар жаатындагы процесстерди электрондоштурууга багытталган “Сыйлык” маалыматтык системасы иштелип чыгып жатканы маалымдалды.
Жыйындын соңунда Адылбек Касымалиев мамлекеттик органдарга аталган реформаларды 100 күндүн ичинде ишке ашырып, конкреттүү жыйынтык көрсөтүү боюнча тапшырмаларды берди.
