Ош жана Жалал-Абадда мыйзамсыз тамеки продукциясы аныкталды
Мамлекеттик салык кызматы Ош жана Жалал-Абад облустарында акциздик маркасы жок тамеки продукцияларын мыйзамсыз жүгүртүү фактыларын аныктады.
Салык кызматынын маалыматына ылайык, Ош облусунун Өзгөн районундагы Куршаб айылынын борбордук базарында жүргүзүлгөн рейд учурунда акциздик маркасы жок 388 куту тамеки сатылып жатканы аныкталган.
Ошондой эле Жалал-Абад облусунун Ноокен районунда ички иштер органдары менен биргеликте жүргүзүлгөн текшерүүнүн жүрүшүндө Кызыл-Туу көчөсүндөгү үйлөрдүн биринен акцизсиз 520 куту тамеки табылып, алынган.
Мындан тышкары, Ала-Бука районунда дагы акциздик маркасы жок 9 миң куту тамеки аныкталганы маалым болду.
Аталган фактылар боюнча тиешелүү актылар түзүлүп, материалдар юридикалык баа берүү үчүн укук коргоо органдарына өткөрүлүп берилди.
