Ташкенттеги Food City базарында Кыргызстандын соода павильону ачылат
15-майда Ташкент шаарында Экономика жана коммерция министрлигине караштуу Кыргызстандын Өзбекстандагы Соода өкүлчүлүгү менен Өзбекстандын FOODSTUFFS SELL компаниясы кызматташуу тууралуу келишимге кол коюшту. Бул тууралуу ведомстводон билдиришти.
Документке ылайык, Өзбекстандагы эң ири соода-логистикалык комплекстердин бири болгон Food City базарынын аймагында Кыргызстандын Соода павильону ачылат.
Маалыматка ылайык, бул долбоор кыргыз-өзбек соода-экономикалык кызматташтыгын өнүктүрүүгө жана ата мекендик продукцияны Өзбекстандын рыногуна чыгарууга багытталган.
Соода павильонунда Кыргызстандын тамак-аш тармагындагы өндүрүүчүлөрүнүн продукцияларынын туруктуу көргөзмөсү уюштурулат. Анда айыл чарба, кайра иштетүү жана тамак-аш өнөр жайына тиешелүү экологиялык таза жана атаандаштыкка жөндөмдүү товарлар сунушталат.
Долбоордун алкагында кыргыз өндүрүүчүлөрү менен өзбек дистрибьюторлорунун ортосунда түз байланыштарды түзүү, экспорттук мүмкүнчүлүктөрдү кеңейтүү жана улуттук продукцияны тышкы рынокко системалуу түрдө чыгаруу көздөлүүдө.
Кыргызстандын Соода өкүлү Бакай Акбаралиевдин айтымында, Food City аймагында павильондун ачылышы ата мекендик өндүрүүчүлөрдүн Өзбекстан рыногундагы позициясын бекемдөөгө жардам берет.
“Биз кыргыз продукциясын илгерилетүүнүн туруктуу каналын түзүп, экспорттук мүмкүнчүлүктөрдү кеңейтүүгө шарт жаратып жатабыз”, — деди ал.
Тараптар бул долбоор эки өлкөнүн ортосундагы соода көлөмүн көбөйтүүгө жана өнөктөштүк мамилелерди бекемдөөгө өбөлгө болоруна ишеним билдиришти.
