Ысык-Ата районунун өз алдынча башкаруу органдарында 51 млн сомдон ашык мыйзам бузуу болгон
КРнын Эсептөө палатасы Чүй облусунун Ысык-Ата районундагы жергиликтүү өз алдынча башкаруу органдарынын бюджеттерине жана муниципалдык ишканалардын ишине жүргүзүлгөн аудиттин жыйынтыгын чыгарды.
Эсептөө палатасынын маалыматына ылайык, 2024-жыл үчүн жүргүзүлгөн текшерүүлөрдүн жыйынтыгында жалпы 51,1 млн сом өлчөмүндө каржылык мыйзам бузуу жана кемчиликтер аныкталган. Анын ичинен 13,5 млн сомду калыбына келтирүү талап кылынса, аудит маалында 8,3 млн сом өндүрүлгөн.
Аудиттин жүрүшүндө бюджеттик каражаттарды максатсыз пайдалануу, сатып алуулардагы мыйзам бузуулар, ижара келишимдеринин талаптарын сактабоо, ашыкча чыгымдар жана мүлктү эсепке алуудагы кемчиликтер аныкталганы белгиленди.
Ошондой эле товарларды, жумуштарды жана кызмат көрсөтүүлөрдү сатып алуудагы мыйзам бузуулардын көлөмү 11 млн сомдон ашкан.
Текшерүүнүн жыйынтыгы боюнча тиешелүү органдарга жазма буйруктар жөнөтүлүп, аныкталган мыйзам бузууларды жоюу жана мындан ары мындай фактыларга жол бербөө тапшырмасы берилди.
