Кыргызстан климаттык туруктуулукту чыңдоого 27 млн доллар жумшайт
Бишкек шаарында жергиликтүү жамааттардын климаттык туруктуулугун бекемдөө маселелерине арналган Диалог уюштурулду. Бул тууралуу Экономика жана коммерция министрлигинен билдиришти.
Иш-чара Дүйнөлүк банктын колдоосу менен ишке ашырылып жаткан Коомчулуктардын демилгеси боюнча улуттук долбоордун (КДУД) алкагында өттү.
Жыйынга Кыргызстан менен катар Өзбекстан жана Тажикстандан өкүлдөр катышты.
Экономика жана коммерция министри Бакыт Сыдыков аймактарды өнүктүрүүдө климаттык тобокелдиктерди эске алуу өзгөчө маанилүү экенин белгиледи. Анын айтымында, инфраструктура, суу менен камсыздоо, айыл чарба жана энергетика тармагындагы инвестициялар климаттык коркунучтарды талдоонун негизинде жүргүзүлүшү керек.
Панелдик талкууларда катышуучулар климаттык тобокелдиктерди картага түшүрүү, энергияны үнөмдөөчү технологияларды колдонуу, тамчылатып сугаруу системаларын киргизүү, сугат каналдарын модернизациялоо жана кургакчылыкка туруктуу айыл чарба өсүмдүктөрүн өстүрүү боюнча тажрыйбалары менен бөлүшүштү.
Маалыматка ылайык, Коомчулуктардын демилгеси боюнча улуттук долбоор 2025-2029-жылдары ишке ашырылып, өлкөнүн бардык жети облусундагы 40 айыл аймагын камтыйт. Долбоордун жалпы бюджети 27 миллион АКШ долларын түзөт.
