Кыргызстан курулуш тармагына ири инвестиция тартууну көздөөдө
Бүгүн Инвестициялар боюнча улуттук агенттиктин директору Равшанбек Сабиров Новосибирск облусунун бизнес-делегациясы менен жолугушту.
Агенттиктин маалыматына ылайык, делегацияны Новосибирск облусунун Мыйзам чыгаруу жыйынынын төрагасынын орун басары жана "Биринчи Курулуш Фонду" компаниялар тобунун башкы директору Майис Мамедов жетектеди.
Жолугушууда тараптар турак жай жана инфраструктуралык курулуш тармагындагы кызматташтыкты кеңейтүү, курулуш материалдарын өндүрүүнү жергиликтештирүү жана биргелешкен бизнес-форум өткөрүү мүмкүнчүлүктөрүн талкуулашты.
Равшанбек Сабиров Кыргызстан ири курулуш жана инфраструктуралык долбоорлорго катышууга даяр болгон ишенимдүү өнөктөштөрдү тартууга кызыкдар экенин белгиледи.
“Биз Новосибирск облусунун бизнес коомчулугу менен кызматташуунун чоң потенциалын көрүп турабыз жана инвесторлор үчүн эң ыңгайлуу шарттарды түзүүгө даярбыз”, — деди ал.
Жолугушуунун жүрүшүндө россиялык тарапка Кыргызстандагы инвестициялык мыйзамдар, бизнести коргоо чаралары, “бирдиктүү терезе” системасы, ошондой эле инвесторлор үчүн каралган салыктык жана визалык жеңилдиктер тууралуу маалымат берилди.
Жыйынтыгында тараптар өнөктөштүктү мындан ары бекемдөөгө жана биргелешкен инвестициялык долбоорлорду ишке ашырууга кызыкдар экенин билдиришти.
