Кыргызстан менен Швейцария инвестициялык фонд түзүүнү пландоодо
Экономика жана коммерция министрлигинде министр Бакыт Сыдыковдун катышуусунда европалык ири компаниялардын өкүлдөрү менен жолугушуу өттү. Ага "Edelweiss Group", "Piper Deutschland AG", "Swisscows AG", "BRUGG" жана "Mountain Wolf" компанияларынын өкүлдөрү катышты.
Ведомствонун маалыматына ылайык, жолугушууда тараптар инвестициялык, өнөр жай жана технологиялык кызматташтыкты кеңейтүү, ошондой эле Кыргызстанда ири долбоорлорду ишке ашыруу маселелерин талкуулашты. Өзгөчө Евразиялык индустриалдык-финансылык парк жана Кыргыз-Швейцария инвестициялык фондун түзүү демилгелерине көңүл бурулду.
Жыйынтыгында Экономика министрлиги менен "Edelweiss Group" компаниясынын ортосунда эки меморандумга кол коюлду. Алар:
- Евразиялык индустриалдык-финансылык парк түзүү;
- Кыргыз-Швейцария инвестициялык фондун түзүү боюнча кызматташтыкты камтыйт.
Министрликтин маалыматына ылайык, бул демилгелер өлкөгө инвестиция тартууну күчөтүүгө, заманбап технологияларды киргизүүгө, өндүрүш тармагын өнүктүрүүгө жана эл аралык экономикалык кызматташтыкты кеңейтүүгө багытталган.
