Жарык берүүчү лампалардын айрым түрлөрү импорттук бажы алымынан бошотулду
Кыргызстанда жарык диоддук (LED) лампаларды өндүрүүнү колдоо максатында LED модулдардын айрым түрлөрү импорттук бажы алымынан убактылуу бошотулду. Ошондой эле даяр LED лампаларга карата импорттук бажы алымы 5% болуп белгиленди.
Бул чечимдер Кыргыз Республикасынын Президентинин Садыр Жапаров “Майлуу-Суу лампа заводун” калыбына келтирүү жана өнүктүрүү боюнча жарлыгын ишке ашыруунун алкагында кабыл алынды.
Экономика жана коммерция министрлигинин маалыматына ылайык, Евразия экономикалык комиссиясынын аянтчасында Кыргызстандын сунуштары колдоо тапкан. Анын негизинде өлкөгө жалпы көлөмү 23 миллион даанадан ашпаган LED лампаларды өндүрүүгө арналган айрым LED модулдарын бажы алымын төлөбөстөн алып келүүгө уруксат берилди. Бул жеңилдик 2028-жылдын 30-июнуна чейин күчүндө болот.
Бирок жеңилдик товарлардын максаттуу пайдаланыларын тастыктаган документ болгон учурда гана берилет. Мындай документти аткаруу бийлигинин ыйгарым укуктуу органы берет.
Ал эми даяр LED лампаларына карата импорттук бажы алымынын өлчөмү 0 пайыздан 5 пайызга чейин көтөрүлдү. Бул чара 2030-жылдын 31-декабрына чейин колдонулат. Аталган чечимдер ата мекендик өндүрүүчү — «Майлуу-Суу лампа заводу» ААКсын колдоого, өндүрүштүк кубаттуулуктарды жана чыгарылуучу продукциянын түрлөрүн кеңейтүүгө, ошондой эле ички рынокто даяр продукциянын өздүк наркын төмөндөтүүгө жардам берет.
Чечим биринчи кезекте Майлуу-Суу лампа заводу ишканасын колдоого багытталган. Ишкана 2024-жылдан тартып өндүрүштө LED модулдарды колдоно баштаган.
Эске салсак, өткөн айда Президент Садыр Жапаров заводду модернизациялоо үчүн Турукташтыруу фондунан 931,6 млн сом бөлүү тууралуу жарлыкка кол койгон. Ошондой эле Министрлер кабинетине ишкананы стратегиялык объектилердин тизмесинен чыгаруу жана анын аймагында индустриалдык парк түзүү маселесин кароо тапшырылган.
